Keusche Strümp

■ Platt ist der Dialekt von „De verflixte Sumpf“, nicht aber die Inszenierung des Waldau-Theaters

Wat schall dorbi rutsuuern, wenn een all Sötmund heten deit. Dat mutt jo son Oort Casanova ween. He, uns Sötmund (vun Kay Kruppa as Gast smart speelt), hett mit sien olen Fründ Lafrenz (Bernd A. Wessels), n jung verheirodten Geschäftsmann, n Wett afslaten, datt he de keusche Froo, de ok noch Sneewitt heeten deit (vun Antje Klattenhoff anmutig speelt) verföhren, un achteran ton Bewies n Strump vun eer vörwiesen will. Hefft se in eern Duuntje so afmakt.

Iefersüchtig müss he nich ween, harr Lafrenz meent, man nu hett he doch n Bammel. He instrueert sien Huusknecht (Klaus Nowicki lehrt wi mol vun ganz nee Siet kennen) orntlich optopassen, un lett ok noch Gundula, n Fründin vun Sneewitt, as Verstärkung kamen. De, vun Antje Klattenhoff virtuos speelt, hett eegens dree Rullen : Gundula verwannelt sik afwesselnd in Sneewitt un in een fiktive Huusmagd. Se föhrt vigeliensch Regie in dat Stück int Stück un de Keerls gehörig an der Nees rüm. Un se kriggt – keen wunnert dat – an Enn, dat wat se vun Anfang an wullt hett : den Sötmund.

De hett – blangbi – ok sien Stolt. Den billigen Trick, eenfach een vun de Strümp to nehmen, de inn lange Reeg op de Lien hangen dot, will he nich fohren. Un n Geweten hett he ok. Eegens will he sien Fründ dat ersporen, wat se in eern. Duntje afmakt hefft. Un as he schienbor wunnen hett, wüllt se sick scheten. Un dot dat ok. Man dor sünd keen Kugeln mehr in de Pistolen, bloots Zündhüütchens, datt dat n beten knallen deit. Un as se denn achter den Sachverhalt komen dot, hefft se de Erkenntnis : „Wenn wi nu doot weern, worrn wi uns woll fix argern.“

n simplet Stück eegens, man Bernd Poppe hett dat flott inszeneert. Düsse Komedie „De verflixte Strump“, vun Hans Balzer 1954 schreven, speelt in de Biedermeiertied. Dat gifft Bühnenbildner Roland Wehner und de Sniedersche Lore Schnabel mit eer Kostüms Gelegenheit, mol orntlich to wiesen, wat se an scheune Romantik op de Pann hefft.

Würklich seut !

As lichte Kost n gelung un gesmackvullen Saison-Afsluss vör de Pause, mit de dat in den Summer geiht. Bani Barfoot

Weitere Vorstellungen: 23.(20h),25.(20h),26.(19h),27.(19h),29.(20h)Juni, 4.Juli(15.30h)