Snack op Platt: Propaganda in't Radio

■ „Verantwoortung övernehmen“ oder: Treckt doch endlich de Terroristen mol de Büxen daal in de Narichtengevung

„Verantwoortung övernehmen“, seggt de Politikers gern. Ok bi uns. Un grood de Youngsters, de eerst noch welk warrn wüllt. „Verantwoortung“, dor is jem all dat Muul na wussen.

Man dorüm geiht dat an düsse Stee nich. Ik bün in't Nadenken doröver kamen, as ik nüülich in't Radio wedder mol höört heff, datt in Israel 'n Bus in de Luft flagen is. 'N poor dode Mannslüüd, Froon un Kinner hett dat geven. De Hammas-Organisatschoon XYZ „hett de Verantwoortung dorför övernahmen“, hett dat in de Narichten heten. „Und nun zum Wetter: ...“

De Terroristen, de sowat moken doot – vun mannig Lüüd half leevvull, half distanzeert „Terris“ nöömt – de hefft dat Muul vull vun Verantwoortung. Man stellen doot se sik de Verantwoortung nie nich. Se geevt bloots dormit an. Se doot sik regelrecht dormit brüsten, datt se unbedeeligte Minschen dootmookt hefft. Un he föhlt sik denn ok noch as Held, düsse Held in de Bottermelk. Seker doch, de Israelis – draffst eegens „Juden“ seggen? – scheeten ok welk doot. Mehrstendeels junge Bengels, för de Een dat leeddoon kann. Man de sünd in de Regel nich unbedeeligt. De leggt dat to'n Deel gor regelrecht dorop an, dootschaten to warden.

De „Terris“, op de anner Siet, mokt bloots Schrecken sünner 'n bestimmtet Teel. So as de ingelschen Bombers op Hamborg un Dresden dormols. Verbeden kannst' jem dat jo nich. Man wi mööt jemmer propagandistischet Schietspeel nich ok noch mitmoken. Dat is nich intosehn, datt uns' Medien de eer Spraak kritiklos övernehmen doot. „De Organisatschoon XYZ hett för den Anslag de Verantwoortung övernahmen“?

Nee, so is dat nich! Se deit sik bloots dormit brüsten. Un dat schull in uns Narichten denn ok so heeten. Denn wör dat op sien Keern brocht. „Verantwoortung“ hett jümmers son hehren Bismack. Fallt de weg, is dor de Luft rut. Denn gifft dat as Naricht nich mehr veel her. „Sik mit wat brüsten“ – dat is doch eher scheneerlich.

Uns präziese Spraak – ok de hochdüütsche – kann scharp sien as 'n Sweert, wenn een denn dormit ümtogahn weet. Villicht worr dat helpen, dat een or anner Minschenleven to retten.

Denkt dor mol över na, ji Narichtenredakteure!

Bani Barfoot