Schnack op Platt: Nieget ut Schilda

■ Keen Klock Güntsiet vun' Bohnhoff

Överall op de Welt gilt dat: Pünktlich as de Iesenbohn. De harr siet eh un je de nauste Klock. Un överall op de Welt verafred un dreept sick verleevte Pooren un ok anner Minschen – woneem? Ünner de Normalklock vör'n Bohnhoff. Dat allens is all sprickwöörlich. Wenn' dat in Bremen deist, denn löppst du mit dien Rükebusch rüm as Falschgeld, un finnst den Oort un dien Leevste nich. Un se löppt jüst so rüm, un finnt di ok nich, wieldatt se de Klock nich finnen kann. Dor is eenfach keen! Buten un Binnen nich bi den Ingang. Denn kannst eer ok nich finnen. Dat gifft dat nich „bloots-op-/-de- Reeper-bohn-bi-Nacht“, sünnern in Bremen bi Dag un Nacht. Wenn du nämlich op de Noordsiet vun den Bohnhoff kummst, güntsiet vun't Hallen- un Parkgeldveddel, wat in fröhere Tieden Börgerweid heeten hett. Ganz fröher hett an düsse Stee achtern Bohnhoff mol'n Gaswark stahn, un achteran n lang Tiet gor nix. Denn weer dor'n bescheeden Utgang vun' Bohnhof mit'n stinknormale Bohnhoffsklock dorbi. Un nu hefft se düssen Protzboo dorhenklotzt: Passage Bürgerweide. Hett vun Wieden wat vun' Bohnhoff. Tominnst de Bogenswung vun de Bohnhoffskuppel un vun de Fassaad op de anner Siet is in dat Vördack to sehn. Man an de Stee, wo eegens –n Klock henhöörn worr, is blots so–n langwielig Reklame-Logo. Op den Platz sülms is ok keen Klock op –n Stänner, as sick dat för –n anstännigen Bohnhoffsvörplatz gehöören deit. Aver nee – de Bohnhoffsvörplatz, de Anspruch op den Nomen hett, de is jo op de anner Siet. Düssen Platz hier – korrekterwies harrn se em Bohnhoffsachterplatz nöömen schullt – hefft se – dat weer –n Politschen Akt – na –n fröhern Börgermeester vun Berlin nöömt, de egens –n Lübecker west is. Un de bruuk keen Klock, meent se woll, de Dezimalsozikraatschen Lokalpolitikers, den sien is eh aflopen. Keeneen is tostännig för de Klock, de dat nich gifft. De Bohn nich – de Passag Börgerweid is jo privat. De privaten Bedrievers nich – wi sünd doch nich de Bohn. De Stadt all gor nich – de hett mit eer Milljoonen för de niegen Hallen noog to doon, dor sünd keen Poormarkföftig för so–n appeldwatsche Klock över. Woneem schall ik mi denn nu in tokoomen Tieden – wo ik vun Findorff koom – mit Dietlinde ut Swackkoppshusen or gor mit Thill ut Oslebshusen verafreden, wenn dor an– Bohnhoff-Noord keen Klock steiht? froogt:

Berni Kelb