Elfi speelt Elfie

■ „Pension Sünnschien“ op Waldau is wirbelwinnig un wunnerbar

An ole Lüüd is ornlich Geld to verdeen'. Na dat Motto ward de meersten Olen-Panschoonen bedreven. Un de Lüüd ward meerstens hollen, as in so 'n Middelding twüschen Krankenhuus un Kaschott. Dor gifft dat eegens nich veel to lachen, un dat is keen Thema för 'n Schwank.

So is dat ok in de „Pension Sünnschien“, de vun dat Ehepoor Ida un Otto Salm (vun Martina Rüggebrecht und Horst Ahrenthold speelt) bedreven ward. Man Karl Wittlinger hett dor 'n Sück vun mokt – un Bernd Poppe, dat nawussen Talent, hett dat in de stilsekeren Kulissen vun Roland Wehner wunnerbor inszeneert – wo Freid opkomen deit. So de rechte Mischung vun echte Freid un berechtigte Schadensfreid. Dat deit duppelt good.

Dat kummt in gang, as Elfie opkrüzen deit, vun Elfie Schrodt so wirbelwinnig speelt, datt de annern Speelers meist 'n beten kort kummt. Elfi hett Geld, se hett wat arvt, und kann nu Wiehnachtsmann / Goode Fee speelen. Man se kümmt jüst utn Knast, wo se mannichmol seten un fix wat lehrt hett för dat Leven.

So platzt se in de Pension Sünnschien rin un bringt dor wat in gang, wat de neerige Inhabersche un eern averbasigen Keerl in de Schranken wiest. Se wiest de annern Bewohners, woans een dat anstellen mutt, datt 'n gemeensom sien Rechten dörchsetten deit.

De „Annern“ (vun Ingeborg Heydorn, Wiegand Haar, Inge Wrieden und Olaf Kreutzenbeck, as Gast, jeedeen op sien eegen Oort fien speelt) sünd toeerst pikiert, denn neeschierig, denn kriggt se töögerlich Moot, denn fallt se wedder üm. So recht as int würkliche Leven.

Man dat geiht, wennn sick truen deit. Dor ward de Dischen tosomen- un de Huusordnung per Afstimmung opn Kopp stellt, dor ward fieert, sungen un danzt, un – dat Leegste, wat passeren kunn: se grööt all mit 'n kräftiget „Moin!“ Dat harr de Olsch uns Elfie an Anfang verbeeden wullt, vun wegen de „kultivierte Atmosphäre“, mit se so Reklam moken deit ...

Kloor, dat dat good utgeiht. Man woans, de Pointe mit 'n lütten Schissellaveng, ward hier nich verrodt.

Man een Gedanke lett mi nich los: Wat is in all de veelen „Pensionen Sünnschien“, in de keen Elfie opkrüüzen deit? Un woneem gifft dat överhaupt 'n „Lüttkrimminelle“, de duuernt in Knast sitt, un jüst, as wedder mol rutkümmt, arven deit, un denn ok noch int rechte Oller is, sick 'n Pension Sünnschien so söken?

De Fragen, de so 'n Lustspeel opröhren deit, sünd allens anner als lustig. Bani Barfoot

Aufführungen am 27.11 um 20 Uhr, am 28.11. um 19 Uhr sowie am 29.11. um 15.30 Uhr