Öl auf die Wogen

■ De anonymen Freedensstifters

Enerwegens op de Welt is jümmer so'n beten Krieg. Dor blitzt un bummst dat, dor scheet un slaat se sick doot or to Krüppels. De Grote op den Lütten, de mit dat Heckler & Koch Stormgewehr op den mit de Vagelflint or mit de gode ole Karla Schnikow, un an besten op de Zivilisten, de gor nix hefft womit se sick verdeffendeeren köönt. Jümmers von baben n ünnen. Annersrüm kummt dat nich vör. Dat wöör jo Insubordinatschon! De Verletzten schreet, de Dooden swiggt still, de vergewaltigten Froon in jümmer Not makt de Kinner, de se dorvun kriggt, doot. Man de, de ganz baben sitten dot, de nich sülmst scheeten möt sünnern dat anner Lüüd maken loten köönt, de passeert nie nich wat. De Generolen un Feldherren sünd jo Gentlemen. De dot een'n den annern nix. För de is dat as'n Golf- Partie — n'sinnig Word in düssen Tosoomenhang —: Jedeen ist „fair“. As dat bi Sportlers sien mutt. Wenn du dat allens so hören, sehen un lesen deist — ohgottogottogott! Kannst nix an moken. Kannst würklich nicht? Kann keeneen dat? Nee, nee, so'n beten hapen blifft doch jümmers. Also paß op:

Dat gifft ok noch Lüüd mit'n Geweten. De lett dat Unrecht un de Gewalt nich slapen in de Nacht. De groten Reeders meen ick. De hefft Geld, Macht, Verbinnungen un Influß. Un se sünd bescheeden. Se dot eer goodet Wark in't Stille, so as de Freemuurers. Un se sünd plietsch. Anns weern se jo ok nich so riek. Se hefft dat Weeten, dat sick in Generatschoon'n vün de Christliche Seefohrt akkumuleert hett. Un nu laat se jemmer Wiesheit ut 'n Sack, man - bescheeden as se nu mol sünd - ganz stikkum, datt dat keeneen marken schall. In düssen speziellen Fall: Dat gifft dor 'n olen Trick, de sick in de Seefohrt so good bewährt hett, datt he in den allgemeen'n Spraakgebruk ingahn is: Wenn dat enerwegens Trabbel gifft, is dat beste Gegenmittel - as de Hochdüütschen seggt, ok de hefft dat begrepen —: „Öl auf die Wogen gießen!“

Un so laat uns Reeders denn jemmer groote Tankscheepen vun de Leine as de Jägers eer Dackels. De Scheepen hefft se — umsichtig as se sünd — extra för düssen Zweck 'n beten verrotten loten, datt dat nich so opfallt. 'n poor lüttje Proben hier und dor, un denn geiht dat in de Vullen: Alaska, la Corrunja, de Schetlands, un dat geiht för gewiß noch wieder. Öl op de Wogen för den Freeden in de Welt!

Keen seggt dor wat vun doote Deerten: Seevagels, Robben, Ottern, Lachs un Muscheln? Wat schall dat! Wo sünd all de Tierschützers mit jümmer Transparenten den west, as in den grooten Krieg de Städte tweigahn sünd, as Millionen vun Müüs, Rotten, Wanzen, Kakerlaken, Katten, Hunnen, un sogor Peer — to de Tied geev dat jo noch 'n Barg Gespanne — verbrennt, verschütt't un verreckt sünd?

Jo, so ist dat. Un so geiht dat. Öl op de Wogen. Wokeen dat havereerte Schipp denn tohören deit — dat is achteran nich uttomaken. Bescheeden as de Freemuurers. Flagge, Register, Natschoon, Hüüertarif, Stüüer, Dividende, Gesetzen, Vörschriften — watt schall dat allens! Se — de Reeders — doot jemmer goodet Wark anonym. Se hefft eer'n Ehrenkodex.

Nee, nee, to dörchsichtig sünd mi all de Vorwörfen un Anschülligungen. Op uns Reeders lat ick nix komen! De versöökt tominnst wat. Wat dot de annern denn för den Freeden? Berni Kelb