Des fend i fei sauguad

betr.: „Die CDU-Basis rebelliert zweimal gegen die Parteispitze“, „Sprachwacht am Rhein“, taz vom 3. 12. 08

Dr Bollmann schreibt em Kaschde zom Pardeidag, d’Schwarze aus BaWü wellet Deitsch als Fremdsprach („Deutsch als Fremdsprache“) ens Grondgsetz aufnemma. Des fend i fei sauguad. Ond au ehrlich: wenn dia Politikerseggel schwätzat, vrstaht doch sowieso koi Sau, was se wirklich moinat. S’isch halt a Fremdsprach, dui koiner reacht ka. Aber wia wellet se des drnach jetz regla: wenn Deitsch endlich als Fremdsprach anerkannt isch, hend mir na älle a Areacht auf an Iebersetzer? Also i oin, der mirs ens Schwäbische iebersetzt? Mai Weib oin firs Spanische? Ond dr Ahmed, mit dem d’Berta äbbes hat, oin fir Arabisch? DOLF STRAUB, Berli