Lokalkoloratur

Nu hebbt de Afordneten vun de Börgerschop aber bannig wat to doon kreegen, tominnst de meesten, de keen platt künnt. De mut nu plattdüütsch lern, also fremdsprooklichen Ünnerricht nehm, sotoseggen. Det hebbt se Dieter Obermeier vun de Statt Partei to verdanken. De hett an Dünnerstach een Andrag eenbracht, dat de Börgerschop besluten schall, dat se tokünftig „tominnst eenmal in Johr op plattdüütsch eene Debatte föhren“deit. Dormit het he een Andrag vun de CDU rutsmeeten. De hett bloots verlangt, dat de „Senoot platt snacken un schrieben schall, wenn de Börgerschop em op platt wat froogt, wat seggt oder wat to doon gifft.“Dat, hett de Quiddje Obermeier seggt, is toweenig, denn de plattdüütsche Sprook mutt in de Börgerschop snackt warn, datt se nich ünnergaan schall. Un all de annern Afordneten hett jo seggt un sien Andrag tostimmt, sogoor de, de keen platt künnt. Ob de abers weeten, wat se besluten hebbt, weet wi nich. smv