Snack op Platt: Emil un de willen Deerten

■ Wat weiht uns dor op'n Schrievdisch vun de taz-bremen-Kulturredaktschoon? Twee plattdüütsche Kinnerböker mit Billers wie'n Aventüür-Land

Emil, 'n lüttjen Baar. Süht meist so ut, as'n ordinären Teddy-Baar, man he is witt. Is dat nu'n Iesbaar, or'n Albino vun Bruunbar? Een Doon! He is allerleevst. Kann Winnie de Puh sik – tominnst wat de Biller angeiht – noch'n Schiev vun afsnieden.

Twee plattdüütsche Kinnerböker: „Ut'n Leven von Emil – Een Book op Platt för Lüüd af annerthalf“ un „Wenn de Sünn mööd splapen geiht ... – 'n plattdüütsch Godenachtbook von Birgit Lemmermann – 'n Book för lüttje Lüüd, de na Bett hen schüllt ...“. He – Emil – hett'n Teddyjung, wenn dat mol so seggen draff. Jüst so, as anns de lüttjen Jungs 'n Teddybaarn hebbt.

Dat eerste Book hannelt vun den Alldag vun Emil. Mit sien Fründ, 'n Bruunbaarn, de so utsüht as he sülmst, bloots nich witt, geiht he wannern, telten, paddelt mit de ool Baadwann, lett sik vun den Fisch wat vertellen, pleegt dat Gemüüs in den Goorn, feudelt de Köök, wo he bit Backen dat Mehl verkleit hett, un all sowatt. Alldag jüst. Dat anner Book vertellt, wat elk een Avend passeeren deit, wenn de Sünn mööd slapen geiht. Wedder Emil mit sien Teddyjung in Arm. Int eerste Book geev dat nich veel Deerten. Mol'n Katt or'n Fisch, man nu geiht richtig los. Nu gifft dat de willen Deerten. De hefft bi Emil 'n eegen Book, woneem se all in vörkamen un rutkrupen doot. (Ok'n Krüüzritter is so een vun de willen Deerten.)

Wat – Emil schall avends na de Puch gahn? „... Un denn geiht dat mit Gejuch – rin in de Puch!“? Nee! Dor mutt he doch toeerst noch mit de Geetkann dat Füüer int Muul vun den Draken utmoken! In dütt tweete Book gifft dat op elk een Siet – bit op dat Droomland – 'n poor Deerten in de bunte Veelfolt to entdecken.

„Fleeg wiet int Dromomland nu, mien Kind, wo all de Slaapgeschichten sünd ...“ Un he flüggt, mit sien Teddyjung in Arm, mit sien Deek intüütert in groot Blatt as in Kokon, un dat Blatt ward vun Anker an rustige Keed int bunte Droomland fasthollen.

Birgit Lemmermann eer gröttstet Talent bi düsse Böker is seker de Moleree. De Biller sünd'n wohret Aventüür-Land för lüttje Kinner: bunt, man nich naiv, sünnern op'n kindgerechte Oort realistisch. Dor steekt 'n Barg Arbeid bin, kannst sehn. Man ok de Text kann sik sehen laten. Op dat Knappste verdichtete Wöör, op elk een Siet een Satz, int tweete Book sogor riemelt. Den kann ok'n Kind vun twee Johren good op Platt anhören un verstahn, dat is nich toveel – un den geiht dat op Entde-ckungsreis in dat Bild, wat dorto hören deit. Un dat Platt is püük un ornlich, nich son „Godewind-Kauderwelsch“.

Un datt de Text so knapp is – nu ja, dat is in düssen Fall kindgerecht, dat is dorto „eh“ plattdüütsche Oort. De beiden Böker tosomen hefft nich so veel Text, as düsse Rezension. Man uns Birgit mutt jo ok nich för Zeilenhonorar schrieven. Bani Barfoot

„Ut'n Leven vun Emil“, ISBN 3-981 388-4-4, 28,60 Mark; „Wenn de Sünn mööd slapengeiht...“, ISBN 3-9807 132-8-8, 29,80 Mark; erhältlich im Buchhandel oder direkt bei Birgit Lemmermann, Fünfhausen 12, 28870 Otterstedt