Mir sprechn fei Hochdeudsch

betr.: „Franken! Ende! Schluss! Sense!“ (Wieder muss ein Volksstamm dringend aus der Bundesrepublik ausgebürgert werden), taz vom 25. 11. 06

Also des war fei a gescheid amüsander Ardiggl den Sie da druggd ham, auch wenner scho midunda aweng boshaffd war (ich kann den Schreiberling ja gern amol zu am Brodzeidweddessn eilodn um zu messn wer hier die glannere „Broodwoschd“ hadd).

Ma mou si aba wundern, dass ihr Breissn-Sägg überhaupt an Underschied zwischn Franggn und Bayern (im Folgenden korrekterweise „Altbayern“) kennd. Nomalerweis hasts wemma an vo Euch driffd nämlich imma: „Allmächd, aus Bayern seid Ihr!“ … wobei, des „Allmächd“ als Ausdrugg der Verwunderung is in Euerm begrensdn Woddschatz glaub i gar ned vorhandn.

Auf jedn Fall hat ma an a baar feine Nuancen scho gmergt, dass auch der Audor Ihres gud reschaschierdn Berichds uns imma no net gscheid vo denna Altbayern unterscheidn ko (a Frangge dät zum Beischbill niemals „zum Deufi“ blärrn, nedd amol zu solchi Reigschmeggde wie Euch)!

Ansonsdn hadd a bissle was (oberflächlich betrachtet) scho gschdimmd, außer villeichd no des mibm Lodda Maddäus: den hamma net eigschleust sondann nausgschmissn! Wall wemma als Frangge ned beim Glubb spilld, des is scho schlimm. Aba wemma dann a no zu die Isar-Bazis (FC Altbayern München) gehd, dann had ma sichs bei uns verschissn.

Wie gsachd, des hat mi gfreit in an so am seriösn und indernational vielzidierdn Bläddla wie der taz von unserem schönen Bundesland Franken (Frei statt Bayern!) zu lesn. Bloß des mibm Dialekt habi ned kabierd – mir sprechn fei Hochdeudsch.

MICHAEL MÖDL, Nürnberg