Nulla via in portam
AS Roma superat SEH (societas artis exercitatricis Hamburgensis) uno folle in portam impulso adversus zerum follium in portarum impulsorum
a KLAUS MACKOWIAK
Campus pedeludarius est omnis divisus in partes duas, quarum unam incoluit AS Roma, aliam, qui ipsorum lingua HSV (Hamburger Sportverein), nostra SEH (societas artis exercitatricis Hamburgensis) appellantur. Consuetudine putatur ludus harpasti pulcher, si utraque turma saepe, celeriter eleganterque in partem parteque alius currit. AS Roma prima dimidia hora conata est, cum sine pedilusoribus praeclarissimis inissent: sine Battistuta, sine Totti, sine Zanetti. Causa erat: rotatio.
SEH triginta minuta mediocriter meliusque defendit, ut AS Roma nullam occasionem follis impellendi habuerit, nisi coniectum Montellae in tertio decimo minuto, qui postem sinistrum pertubaverit. Tum venit tricesimum tertium minutum, minutum fatale portae custodi H.-J. Butt: manu Germana errore portae custodis a Bayer Leverkusen iam superata sinit coniectum e viginti metris infirme missum defensoris Romanorum Guigou sub corpore suo in portam perrepere. AS Roma turmae Hamburgensi uno folle impulso adversum zerum follium impulsorum praestat. Deinde Romani fortius facti sunt, SEH und Butt infirmius. Postquam follis in quadragesimo quinto minuto super custodem ad portam volavit, oppugnatori Marcel Ketelaer servandum fuit in linea. Cogitationes periculum in se recipientium societatis dirigendae erunt ad Butt. Scriptor Germanus praeclarus Günter Grass haec prospexisse videtur custode Butt puero parvo, cum iam eo tempore de his quaestionibus scripsisset in libro noto: „Der Butt“.
Manet quaestio: Fueruntne correctae artis, quas exercitator secum reputaverat? Sinit tres oppugnatores ludere, qui autem aliquantum destituti sunt. Nam campus medius occupatus est solum tenuiter: solum tribus medianis, e quibus unus, Kientz, potius lusit prae catena quadruplice vir liber. Praeterea desunt mediani optimi: Cardoso, Groth etc.
Quid exercitator Pagelsdorf custodi manuique totae in intervallo dixerit? Hac oratione ab Pagelsdorf habita SEH prima viginti minuta secundae partis fuit praestantior, sed occasiones sincerae effodere non potuit. Non modum in eo spatio ludi AS Roma paulisper frustravit, nisi in dextra ala praecipuus Cafu et Totti postea inmissus.
Apud SEH persuaserunt studio conspectuque Töfting et celeritate artificioque iuvenis Yilmaz in secunda parte inmissus, qui suae turmae occasionem optimam follis in portam impellendi effodit. Romanis paulisper frustantibus in toto oportuisset AS Romam SEH superavisse multo altius. Pediludoribus ex Hamburg est comes valde adiuvans: fortuna secunda. Pediludium est ludus simplex, sed non facilis. Et facile societati artis exercitatricis Hamburgensi non fiet AS Romam domi in urbe Hamburg superare.
Übersetzung und ausführlicheres Glossar können per e-Mail ( sport@taz.de ) oder Fax (030/ 2 51 60 62) angefordert werden.
