KOMMENTARE: Die »Andi-Sachsn-Bille«
■ En Hässe im Gamf gäschn dän sächsschn Dialeggd
Orbeider, Angeschdellde unn Beamde aus Sachsn, die Ihr im Berliner öffendlischn Diensd dädsch seid — offgebaßd! Innsenador Hegglmann will Eusch an'n sächsschn Gragen. Seid gurzm läßd er in alln Diensdschdelln Fraageböschn verdeiln, in dän nisch nur nach friehren Schdasi-Gondagdn unn SED-Midgliedschafd gefroochd wird, sondern ooch nach der »landsmannschafdlischn Hergunfd«. Off gud Sächssch heeßd das: mir solln Obfer unsrer gehaßd-geliebdn Sproche wärn. Mir sinn embördd, Herr Hegglmann! Womid ham mir Sachsn — Revoludschionäre der ersdn Schdunde — das verdiend? S'is weiß Godd schwer genug, evenduelle SED- und Schdasi-Vergangheid zu verleugnen. Da bleibd uns geine Zeid fier »Hegglmann-Hessisch-Deudschgurse«. Ärlisch. Wie solln mir aber een Dialeggd, der uns guasi in de »sozialisdsche Wiesche« geläschd wurde, von heude off morschen verleugnen? Frei nach'm Moddo: »Nach'n Wendehälsn de Wendezungen«, »Dor Sachse — ä Wäsn midd geschbaldner Zunge«?
All die wohlhamdn Rheinländer, Bayern unn Schwoben hamm damals midd Genugduung unsre lauden Schreie im angebornen Dialeggd nach Übervader »Gool« verfolschd und lachen noch heude, wenn mir das exoodische Word »Bonone« nur in' Mund nähm. Jedzd solln ooch noch Hegglmanns »verdeggde Dialeggdermiddler« off uns angesedsd wärn, um Blads fier ihre hesschen Golläschn im Berliner öffendlischn Diensd zu schaffn.
Bürschermeisderin Grisdiene Bergmann, der's off beneidenswerde Weise gelingd, ihrn »Dräsdnor Urschbrungsdialeggd« zu verdräng, iss unser Vorbild. Aber ooch in ihrer Brusd wohn zwee Seeln. Vielleischd gann sie uns als gelernde Abbodägerin 'ne »Andi-Sachsen-Bille« verschreim, mid der mir Hegglmann beim Ausfülln seiner disgriminierndn Frageböschn überlisdn gönn? Grisdiene: Hilf uns Sachsn im Gamf gäschn unsre ureischne »Dialeggd«ig! Barbara Bollwahn, geborn unn offgewachsn in Sachsn
taz lesen kann jede:r
Als Genossenschaft gehören wir unseren Leser:innen. Und unser Journalismus ist nicht nur 100 % konzernfrei, sondern auch kostenfrei zugänglich. Texte, die es nicht allen recht machen und Stimmen, die man woanders nicht hört – immer aus Überzeugung und hier auf taz.de ohne Paywall. Unsere Leser:innen müssen nichts bezahlen, wissen aber, dass guter, kritischer Journalismus nicht aus dem Nichts entsteht. Dafür sind wir sehr dankbar. Damit wir auch morgen noch unseren Journalismus machen können, brauchen wir mehr Unterstützung. Unser nächstes Ziel: 40.000 – und mit Ihrer Beteiligung können wir es schaffen. Setzen Sie ein Zeichen für die taz und für die Zukunft unseres Journalismus. Mit nur 5,- Euro sind Sie dabei! Jetzt unterstützen
